Home
ગુજરાત
ગુજરાતમાં ગરમીનો કહેર વધશે, 15 મે બાદ પ્રી-મોન્સૂન એક્ટિવિટી તેજ બનવાની શક્યતા

ગુજરાતમાં ગરમીનો કહેર વધશે, 15 મે બાદ પ્રી-મોન્સૂન એક્ટિવિટી તેજ બનવાની શક્યતા

09:39 PM May 09, 2026 Gujju News Channel

Ambalal Patel Forecast : આજે એટલે કે 9 મે બાદ ગુજરાતના મોટાભાગના વિસ્તારોમાં ગરમીનું પ્રમાણ ઝડપથી વધશે અને અનેક શહેરોમાં તાપમાન 44 થી 45 ડિગ્રી સુધી પહોંચી શકે

Ambalal Patel Forecast : ગુજરાતમાં આગાહી દિવસોમાં ગરમીનો કહેર વધી શકે છે. વાસ્તવમાં હવામાન નિષ્ણાંત અંબાલાલ પટેલ દ્વારા રાજ્યના હવામાનને લઈને મહત્વપૂર્ણ આગાહી કરવામાં આવી છે. તેમના જણાવ્યા અનુસાર આજે એટલે કે 9 મે બાદ ગુજરાતના મોટાભાગના વિસ્તારોમાં ગરમીનું પ્રમાણ ઝડપથી વધશે અને અનેક શહેરોમાં તાપમાન 44 થી 45 ડિગ્રી સુધી પહોંચી શકે છે. ઉત્તર પશ્ચિમ અને પશ્ચિમ દિશાના ગરમ પવનોને કારણે લોકોમાં ઉકળાટ અને ગરમીનો અનુભવ વધુ રહેશે. Ambalal Patel Forecast premonsoon activity

► રાજ્યમાં તાપમાન ઊંચા સ્તરે પહોંચવાની શક્યતા

મધ્ય ગુજરાતના વડોદરા, આણંદ અને ખેડા જિલ્લામાં ગરમીનો પ્રકોપ વધુ જોવા મળી શકે છે. અમદાવાદમાં પણ આગામી દિવસોમાં આકરી ગરમીનો સામનો કરવો પડી શકે છે. ઉત્તર ગુજરાતના પાટણ, સમી અને હારીજ જેવા વિસ્તારોમાં તાપમાન ઊંચા સ્તરે પહોંચવાની શક્યતા વ્યક્ત કરવામાં આવી છે. આ સાથે હિંમતનગર, સાબરકાંઠા, અરવલ્લી, મહેસાણા અને પંચમહાલ જિલ્લામાં તાપમાન 43 થી 44 ડિગ્રી સુધી જઈ શકે છે. સૌરાષ્ટ્ર અને કચ્છના વિસ્તારોમાં પણ ગરમીનો માહોલ યથાવત રહેશે. રાજકોટમાં તાપમાન 42 થી 43 ડિગ્રી સુધી પહોંચી શકે છે, જ્યારે કચ્છમાં ખાસ કરીને ભુજ શહેરમાં ગરમીનો પ્રભાવ વધુ રહેશે.

► સુરેન્દ્રનગર-હળવદ વિસ્તારમાં 44 ડિગ્રી સુધી તાપમાન પહોંચવાની સંભાવના

સુરેન્દ્રનગર અને હળવદ વિસ્તારમાં 44 ડિગ્રી સુધી તાપમાન પહોંચવાની સંભાવના છે. જૂનાગઢ, અમરેલી અને ભાવનગર જિલ્લામાં પણ ભારે ગરમી અનુભવાશે. જોકે પશ્ચિમ સૌરાષ્ટ્રના કેટલાક દરિયાકાંઠાના વિસ્તારોમાં તાપમાન થોડું ઓછું રહી શકે છે. પોરબંદર અને જામનગરમાં આશરે 36 ડિગ્રી તાપમાન રહેવાની શક્યતા છે, જ્યારે દક્ષિણ ગુજરાતમાં તાપમાન 34 ડિગ્રી આસપાસ રહી શકે છે.

► 15 મે બાદ રાજ્યમાં પ્રી-મોન્સૂન એક્ટિવિટી ધીમે ધીમે સક્રિય બનશે

હવામાન નિષ્ણાંતના જણાવ્યા અનુસાર 15 મે બાદ રાજ્યમાં પ્રી-મોન્સૂન એક્ટિવિટી ધીમે ધીમે સક્રિય બનશે. ખાસ કરીને 18 થી 23 મે દરમિયાન આંધી, વંટોળ અને તેજ પવન સાથે હવામાનમાં પલટો જોવા મળી શકે છે. અરબી સમુદ્ર તરફથી આવતી પવન પ્રણાલીના કારણે કેટલાક વિસ્તારોમાં વાદળછાયું વાતાવરણ અને હળવા વરસાદની શક્યતા પણ વ્યક્ત કરવામાં આવી છે. આ ઉપરાંત 12 થી 20 મે દરમિયાન આંદામાન-નિકોબાર ટાપુઓમાં વરસાદી માહોલ શરૂ થવાની શક્યતા છે. આગાહી મુજબ 26 મે સુધીમાં મોન્સૂન કેરળના કિનારે પહોંચે તેવી સંભાવના વ્યક્ત કરવામાં આવી રહી છે, જે દેશભરમાં ચોમાસાની શરૂઆત માટે મહત્વપૂર્ણ માનવામાં આવે છે.